O helighe hostye, godlike natuere,
die allen begripen zijt te snel.
Tpaesschelam es van hu figuere,
ende tmanna der kijnderen van Israhel;
Abrahams ghifte, Melchisedechs bestel,
ende de aercke daer David voren speelde.
Helyas couxkin, duer shijnghels bevel,
es van hu fyghuere, reyn godlic beelde.
Maer hoe groot, dat noyt fighuere verveelde
der juedscher wet, dats al gheleden,
maer ghy, Sacrament vul hemelscher weelde,
dijn gracie gheduert in eeuwicheden.
Tghelove stelt hier den zin te vreden,
want dijn cracht alle begripen verblent;
lof, wonderlic ghebenedijt Sacrament.

 

 

De indexen van "Hoofdstukken Nederlands" worden geladen...

De indexen van "Iconografie" worden geladen...